ដោយ៖ គង់ហេង
កំពង់ចាម៖ ប្រជាពលរដ្ឋឃុំព្រែកកុយ ស្រុកកងមាស និងឃុំច្បារអំពៅ ស្រុកបាធាយ នឹងទទួលបានសមិទ្ធផលពីរាជរាដ្ឋាភិបាល នឹងទទួលបានស្ពានបេតុងប្រវែងជិត ១០០ ម៉ែត្រ និងមានទទឹងប្រមាណ ១០ ម៉ែត្រ ឆ្លងកាត់ស្ទឹងឆ្វេង តភ្ជាប់ឃុំស្រុកទាំងពីរ។ នេះបើយោងតាមការប្រកាសឱ្យដឹងរបស់ឯកឧត្តម អ៊ុន ចាន់ដា អភិបាលខេត្តកំពង់ចាម នៅក្នុងពិធីបើកការដ្ឋានសាងសង់ស្ពានមួយនេះនៅព្រឹកថ្ងៃទី ៣០ មីនា។
ឯកឧត្តមអភិបាលខេត្តកំពង់ចាមបានថ្លែងថា៖ ក្នុងនោះដែរមានឃុំសូគង ស្រុកកងមាសទទួលបានផ្លូវបេតុងមួយខ្សែចម្ងាយ ៦.០០០ ម៉ែត្រ និងឃុំព្រែកក្របៅ ស្រុកកងមាសដដែលទទួលបានប្រព័ន្ធធារាសាស្រ្ត មានប្រឡាយទឹក និងទ្វារទឹក ចម្ងាយសរុប ២.៧០០ ម៉ែត្រ។
ឯកឧត្តមបានបន្តថា៖ ពិធីបើកការដ្ឋានសាងសង់ និងប្រគល់ទទួលប្រព័ន្ធធារាសាស្ត្រក្រោមវត្តមានចូលរួម តំណាងក្រសួងសាធារណការ និងដឹកជញ្ជូន កងវិស្វកម្មក្រសួងអភិវឌ្ឍន៍ជនបទ និងក្រសួងធនធានទឹកនិងឧតុនិយម៕ 
